Tuesday, December 14, 2010
കുറ്റക്കാരെ ശിക്ഷിച്ചാല് മാത്രം പോരാ
കുറ്റക്കാരെ കണ്ടു പിടിക്കുന്നതും ശിക്ഷിക്കുന്നതും നിസ്സാര കാര്യമല്ല.അതുപോലെ തന്നെ പ്രധാനമാണ് യഥാര്ത്ഥ പ്രതികളെ കണ്ടെത്താന് ശ്രമിച്ചു വിജയിച്ചവരെ പ്രോത്സാഹിപ്പിക്കുകയും സംരക്ഷിക്കുക
യും ചെയ്യുക എന്നത്.അത് ഭരണകൂടത്തിന്റെ ചുമതലയാണ്.
കോളിളക്കം സൃഷ്ടിച്ച പല കേസ്സുകള്ക്കും തുമ്പുണ്ടാക്കുകയും കുറ്റവാളികളെ വേഗത്തില് വലയിലാ
ക്കുകയും ചെയ്ത സമര്ത്ഥനായ പോലീസ് ഓഫീസറാണ് സിബി മത്യൂസ്.കാലാകാലങ്ങളില് മാറി മാറി വരുന്ന ഭരണാധികാരികളുടെ കാലുനക്കി സ്ഥാനങ്ങള് നേടുന്ന സാധാരണ പോലീസ് ഉദ്യോഗസ്ഥരില് നിന്ന് വ്യത്യസ്തനാണ് അദ്ദേഹം. "ഊതുമ്പോള് അങ്ങോട്ടും ഉറിഞ്ചുമ്പോള് ഇങ്ങോട്ടും" എന്ന പതിവു പോലീസ് ശൈലി തനിക്ക് അന്യമാണ് എന്ന് ഇതുവരെയുള്ള അദ്ദേഹത്തുന്റെ ഔദ്യോഗിക ജീവിതം നിരീക്ഷിക്കുന്ന ആര്ക്കും ബോദ്ധ്യമാകും.രാഷ്ട്രീയ ഭേമില്ലാതെ ഭരണാധികാരികളും പൊതുജനങ്ങളും ഈ ഐപി എസ് ഉദ്യോഗസ്ഥനെ സ്നേഹിക്കുന്നതും ബഹുമാനിക്കുന്നതും അതുകൊണ്ടു തന്നെ.
കാര്യപ്രാപ്തിയും ചുമതലാബോധവുമുള്ള ഇത്തരക്കാരോട്, അഴിമതിക്കാരും ആസനം താങ്ങികളുമായ സമതസ്തികക്കാര്ക്കും സഹപ്രവര്ത്തകര്ക്കും അസൂയയും പകയും തോന്നുക സ്വാഭാവികമാണ്.
പക്ഷേ ജനസമ്മതിയും സ്വാധീനവും ഉള്ള സിബി മാത്യൂസിനെപ്പോലുള്ള ഒരാളെ നേരായ മാര്ഗ്ഗത്തില് തോല്പിക്കാനോ ക്ഷീണിപ്പിക്കാനോ അവര്ക്കു സാധിക്കില്ല.അതുകൊണ്ട് ചതിക്കുഴികള് തീര്ത്തും ഒളിയമ്പുകള് എയ്തും അദ്ദേഹ ത്തെ വീഴ്ത്താന് അവര് ശ്രമിച്ചു കൊണ്ടിരിക്കുകയാണ്.അദ്ദേഹത്തെ അഴിമതിക്കാരനായി ചിത്രീകരിച്ച് വിജിലന്സ് കേസില് കുടുക്കാന് ചിലര് നോക്കി.
ഇതുവരെ രണ്ട് കള്ളക്കേസുകളുണ്ടായി. വ്യക്തമായ തെളിവുകളുടെ അഭാവത്തില് രണ്ടും കോടതി തള്ളിക്കളഞ്ഞു.ഔദ്യോഗിക മര്യാദയുടെയും മാന്യതയുടെയും പേരില് ആരോടും പരാതി പറയുകയോ പരസ്യമായി പ്രതികരിക്കുകയോ ചെയ്യാതിരുന്ന അദ്ദേഹം ഇപ്പോള് മൗനം ഭഞ്ജിച്ചിരിക്കുന്നു.മൂന്നാ
മത്തെ കേസ് പ്രതീക്ഷിച്ചിരിക്കുകയാണ് താനെന്നാണ് സിബി മാത്യൂസ് പറയുന്നത്. രണ്ട് കേസുകളും തന്റെ ഔദ്യോഗിക ജീവിതത്തിലെ പ്രധാന മാറ്റങ്ങളുണ്ടാകുന്ന അവസരത്തിലാണ് ആവിര്ഭവിച്ചതെ
ന്നും അദ്ദേഹം ഓര്മ്മിക്കുന്നു.ഡി.ജി.പി. പ്രൊമോഷനുള്ള ലിസ്റ്റില് പേരു വന്നപ്പോഴാണ് രണ്ടാമത്തെ കേസ് കോടതിയില് എത്തിയത്.
ഡി.ജി.പി. സിബി മാത്യൂസിനെ അഴിമതിക്കാരനായി ചിത്രീകരിച്ച് വിജിലന്സ് കേസില് കുടുക്കാന് ഗൂഢാലോചന നടത്തിയത് ഉന്നത ഐ.എ.എസ്. ഉദ്യോഗസ്ഥനായ ടി.ഒ.സൂരജും ഐ.പി.എസ് ലഭിച്ച കെ.കെ.ജോഷ്വയുമാണെന്ന് വ്യക്തമായിരിക്കുകയാണ്. തന്നെ അഴിമതി കേസില് കുടുക്കാന് ശ്രമിക്കുന്ന ഇവര്ക്കെതിരെ സിബി മാത്യൂസ് ഉന്നതകേന്ദ്രങ്ങള്ക്ക് പരാതി നല്കിയിട്ടുണ്ടത്രെ .
കോഴിക്കോട് കളക്ടറായിരുന്നപ്പോഴും പിന്നീട് വ്യവസായ വകുപ്പ് അഡീഷണല് ഡയറക്ടറായിരുന്ന
പ്പോഴുമുണ്ടായ ചില കേസുകളില് റ്റി.ഒ.സൂരജ് കുറ്റക്കാരനാണെന്ന് സര്ക്കാരിലേക്ക് വിജിലന്സ് റിപ്പോര്ട്ട് ചെയ്തിരുന്നു.വിജിലന്സ് അമുക്കി വച്ചിരുന്ന ഈ കേസ് സിബി മാത്യൂസ് വിജിലന്സ് ഡയറക്ടറായിരുന്നപ്പോഴാണ് അന്വേഷിച്ചതും നടപടി സ്വീകരിച്ചതും.ഔദ്യോഗിക കൃത്യനിര്വ്വഹണ
ത്തിന്റെ ഭാഗമായി കൈക്കൊണ്ട നടപടികളാണ് ഐ.എ.എസ് ഉദ്യോഗസ്ഥന്റെ ശത്രുതയ്ക്ക് കാരണം.
തനിക്കെതിരെ വ്യാജ കേസുണ്ടാക്കാന് ശ്രമിച്ച ജോഷ്വയ്ക്കെതിരെ ഡി.ജി.പി. ജേക്കബ് പുന്നൂസിന് രേഖാമൂലം തന്നെ സിബി മാത്യൂസ് പരാതി നല്കിയിട്ടുണ്ട്. ഉന്നതങ്ങളില് നിന്ന് പലതവണ നിര്ബ
ന്ധമുണ്ടായ ശേഷമാണ് പരാതി നല്കാന് തന്നെ അദ്ദേഹം തയ്യാറായതു പോലും. എന്നാല് ആറു മാസമായിട്ടും ഉന്നതോദ്യോഗസ്ഥന്മാര് ഇതിന്മേല് അടയിരിക്കുകയാണ്. ഗൂഢാലോചന തന്റെ മനോവീര്യം കെടുത്തുകയാണെന്ന് സിബി മാത്യൂസ് പരാതിപ്പെടുന്നു.അഴിമതി ഇല്ലാതാക്കാന് സര്വീ
സിലുടനീളം ശ്രമിച്ച തനിക്ക് ഇതാണ് അനുഭവമെങ്കില് മറ്റുള്ളവരുടേത് എന്തായിരിക്കുമെന്ന ഉത്കണ്ഠ അദ്ദേഹത്തിനുണ്ട്.കുറ്റവാളികള്ക്ക് പ്രൊമോഷനും അവരെ പിടിച്ചവര്ക്ക് അവഗണനയും ഭീഷണിയും പതിവാകുന്ന സ്ഥിതിയ്ക്ക് അദ്ദേഹത്തിന്റെ ഉത്കണ്ഠ അസ്ഥാനത്താണെന്നു പറഞ്ഞുകൂടാ.
നീതി നിഷ്ഠനും നിഷ്പക്ഷമതിയും പ്രഗത്ഭനും ആയ ഒരുദ്യോഗസ്ഥനെ അഴിമതിക്കാരും അപ്രാപ്തരും അ
വസരവാദികളും പാദസേവകരുമായ ചില ഉദ്യോഗസ്ഥ ഗുണ്ടകള് വേട്ടയാടുമ്പോള് അധികാരിവര്ഗ്ഗം പുലര്ത്തുന്ന നിഷ്ക്രിയത്വവും നിസ്സംഗതയും യഥാര്ത്ഥത്തില് ഗുണ്ടകളെ സഹായിക്കുന്നതിനു തുല്യമാണ്.വഹിക്കുന്ന സ്ഥാനത്തോട് പൂര്ണ്ണ ഉത്തരവാദിത്തം കാട്ടുന്ന ഉദ്യോഗസ്ഥരുടെ മനോവീര്യം കെടുത്തുന്ന നീക്കങ്ങള് ചെറുക്കേണ്ട കടമ സര്ക്കാരിനുണ്ട്.സംസ്ഥാനത്തിന്റെ പുരോഗതിയും നന്മയും കാംക്ഷിക്കുന്ന ഏതൊരു ഭരണകൂടവും അതില് അലംഭാവം കാട്ടില്ല.
അധികാര സ്ഥാനങ്ങളില് നിന്നും അര്ഹിക്കുന്ന പിന്തുണ കിട്ടിയാലും ഇല്ലെങ്കിലും, സമാധാനവും അഴിമതിയില്ലാത്ത പൊതു ജീവിതവും കാര്യക്ഷമമായ പോലീസ് സംവിധാനവും നിലനിന്നു കാണാന് ആഗ്രഹിക്കുന്ന സാധാരണ ജനങ്ങളുടെ എല്ലാവിധ പിന്തുണയും സഹായവും സിബി മാത്യൂസിന് ഉണ്ടാകുക തന്നെ ചെയ്യും.സത്യ സന്ധനായ അദ്ദേഹത്തോട് നേരിട്ട് എതിര്ക്കാന് കഴിവും തന്റേടവും ധാര്മ്മിക ബലവും ഇല്ലാത്ത സൂരജിനെ പ്പോലുള്ളവര്, ആണും പെണ്ണും കെട്ട ചിലരെ വാടകയ്ക്ക് എടുത്തു നടത്തുന്ന പ്രച്ഛന്ന നാടകം അവസാനിപ്പിക്കാന് ബന്ധപ്പെട്ട അധികാരികള് തയ്യാറായി
ല്ലെങ്കില് പൊതു ജനം അതിനു മുന്നിട്ടിറങ്ങേണ്ടി വരും.
Fans on the page
Sunday, December 5, 2010
അഴിഞ്ഞാട്ടം...അവതാരകരുടെയും ജഡ്ജിമാരുടെയും
പൈങ്കിളി സീരിയലുകളെ വെല്ലുന്ന റിയാലിറ്റി ഷോകള് കൊണ്ടു സമ്പന്നമാണ് മലയാളം ചാനലുകള്.കുട്ടികളെയും രക്ഷിതാക്കളെയും ഒരുപോലെ വഴിതെറ്റിക്കുന്ന റിയാലിറ്റി ഷോകള് നിരന്തരം പെരുകി കൊണ്ടിരിക്കുന്നു.പകര്ച്ച വ്യാധി പോലെ അതു ചാനലില് നിന്നു ചാനലിലേക്കും വിഷയങ്ങ
ളില് നിന്നു വിഷയങ്ങളിലേക്കും വ്യാപിക്കുകയാണ്.കാണികള് ഏറുന്നതിനാനുസരിച്ച് അവതാരകരുടെ
യും വിധി കര്ത്താക്കളുടെയും അഴിഞ്ഞാട്ടവും കൂടുന്നുണ്ട്.ഏഷ്യാനെറ്റിലെ ഐഡിയാ സ്റ്റാര് സിംഗറിന്റെ അവതാരക ഒന്നാംതരം ഉദാഹരണമാണ്.ആ അവതാരകയുടെ വേഷവും ഭാവവും പ്രകടനങ്ങളും കൊ
ഞ്ഞ "മലയാല"വും ചൈനീസ് ഇംഗ്ലീഷും ആരെയും നാണിപ്പിക്കാന് പോരുന്നതാണ്. ആവശ്യത്തിലേ
റെ പ്രാധാന്യം കൊടുത്ത് ചാനല് പ്രമാണിമാര് അപക്വമതിയായ ആ പെണ്കുട്ടിയെ ഒരുതരം മിഥ്യാ
ലോകത്തില് എത്തിച്ചിരിക്കുന്നു;ഒരു പറ്റം കാണികളെയും.
ഇതേ റിയാലിറ്റിഷോയുടെ ഒരു സ്ഥിരം വിധികര്ത്താവാകട്ടെ അവതാരകയെ വെല്ലുന്ന പ്രകടനമാണ് നടത്തുന്നത്.നാട്ടിന് പുറത്തു നിന്നെത്തുന്ന പല മത്സരാര്ത്ഥികളെയും ഒരു തരം റാഗിങ്ങിലൂടെയാണ് ഇദ്ദേഹം നേരേയാക്കി എടുക്കുന്നത്. യുഗ്മ ഗാനങ്ങള് വല്ലപാടും പാടി(അല്ല; അഭിനയിച്ച്) തീര്ക്കുന്ന കുട്ടികളോട് "ഒന്നൂടെ അടുത്തു നിന്നേ,കെട്ടിപ്പിടിച്ച് പാടിക്കേ"എന്നെല്ലാം പറഞ്ഞ് ആഭാസകരമായ രംഗം ആവ്രര്ത്തിപ്പിച്ച് രസിക്കുക ഇദ്ദേഹത്തിന്റെ പതിവാണ്.താന് അവതാരകനും സംവിധായക
നുമായുള്ള "സരിഗമ" എന്ന പരിപാടിയിലും ഇത്തരം തറവേലകള് ഇദ്ദേഹം കാട്ടാറുണ്ട്.ഗായകരും അഭിനേതാക്കളുമായ ആണ് പെണ് ജോഡികളോട് സംഗീത സംബന്ധമായ ചോദ്യങ്ങള് ചോദിക്കു
ന്നതിനിടയില് അശ്ലീലം കലര്ന്ന ദ്വയാര്ത്ഥ പ്രയോഗങ്ങളും വിവാഹ ദല്ലാള് പണിയും ഇദ്ദേഹം നടത്തും.ഇഷ്ടമില്ലാത്തവരെ തെറി പറയാനും പര ദൂഷണത്തിനും "സരിഗമ"യുടെ വേദി ഉപയോഗി
ക്കപ്പെടുന്നുണ്ട്.
അമൃത റ്റി.വിയിലെ "സൂപ്പര് ഡാന്സര് "സൂപ്പര് ഡാന്സര്(ജൂനിയര്)" പരിപാടിയില് അസാമാന്യ വൈഭവം പ്രകടിപ്പിക്കുന്ന കുരുന്നുകളെ കാണാന് കഴിയും.പലപ്പോഴും തുമ്പിയെ കൊണ്ടു കല്ലെടുപ്പിക്കുന്നതുപോലെ തോന്നുന്ന പരിപാടിയില് വിധികര്ത്താവായെത്തുന്ന ഒരു നാട്യപ്രവീണയുടെ വേഷം കെട്ടല് സകല സീമകളും കടക്കുന്നു.ആഭാസകരമായ വേഷം ധരിച്ചുള്ള ഇവരുടെ വാര്ദ്ധക്യം ബാധിച്ച ശരീര പ്രദര്ശനം തെറ്റായ സന്ദേശം പിഞ്ചു മനസ്സില് പതിപ്പിക്കും.നല്ല നര്ത്തകിയായ ഇവരെ ആരാധനയോടെ കാണുന്ന ഇളം തലമുറ "മാമി"നെ അനുകരിക്കാനുള്ള സാദ്ധ്യത ഏറെയാണ്.
റിയാലിറ്റി ഷോകളില് എന്തുകൊണ്ടും വേറിട്ടു നില്ക്കുന്നതാണ് കൈരളിയിലെ "മാമ്പഴം" എന്ന പരി
പാടി.ഈ കാവ്യാലാപന മത്സരത്തില് പക്ഷേ വില്ലന് വേഷം കെട്ടുന്നത് വിധികര്ത്താക്കളും പരസ്യ
വുമാണ്.ഇതു മാമ്പഴമല്ല "പരസ്യപ്പഴ"മാണ് എന്ന് ആളുകള് പറയാന് തുടങ്ങുമാറ് ഔചിത്യമില്ലാത്തവ
ണ്ണമാണ് പരിപാടിയെ വിഴുങ്ങുന്ന പരസ്യങ്ങള് പ്രത്യക്ഷപ്പെടുന്നത്.വിധികര്ത്താക്കളായും അതിഥി
കളായും എത്തുന്ന "മഹാകവി"കളുടെ പാണ്ഡിത്യ പ്രകടനമാണ് ഈ നല്ല പരിപാടിയുടെ ശോഭ കെടു
ത്തുന്ന പ്രധാന ഘടകം.മത്സരാര്ത്ഥികള് ഭംഗിയായി ചൊല്ലിയ കവിതകള് വികലമായി ആവര്ത്തി
ച്ചും കവിതയെ പറ്റി പണ്ടു പഠിച്ചതും പഠിപ്പിച്ചതുമായ സകലതും വിളമ്പി കാണികളുടെയും മത്സരാര്ത്ഥി
കളുടെയും ക്ഷമ പരീക്ഷിക്കുന്നു ഇവര്.
മനുഷ്യമനസ്സുകളെ മലിനപ്പെടുത്തുന്ന റിയാലിറ്റി ഷോകളെയും അഴിഞ്ഞാടുന്ന അവതാരകരെയും അ
തിരു കടക്കുന്ന വിധികര്ത്താക്കളെയും ഒഴിവാക്കിയില്ലെങ്കില് ദൃശ്യ മാദ്ധ്യമങ്ങളെ തന്നെ കാണികള് തിരസ്ക്കരിച്ചു പോകും.
Fans on the page
Tuesday, November 23, 2010
മുന് വി.സി ഹബീബ് മുഹമ്മദ്
കേരള സര്വ്വകലാശാലയുടെ മുന് വൈസ് ചാന്സലര് ശ്രീ.പി.എസ്.ഹബീബ് മുഹമ്മദ് അടുത്തിടെ അന്തരിച്ചു.
ഒരു കാലത്ത് സര്വ്വകലാശാലയിലും ഉന്നത വിദ്യാഭ്യാസ രംഗത്തും ഒരു പോലെ ശോഭിച്ച അദ്ദേഹത്തിന്റെ മരണം മാദ്ധ്യമങ്ങള്ക്ക് പ്രധാനപ്പെട്ട വാര്ത്ത ആയില്ല.ലൈം ലൈറ്റില് നിന്നു മാറിയാല് അവഗണിക്കപ്പെടുന്ന അനുഭവം സിനിമാക്കാര്ക്കും രാഷ്ട്രീയക്കാര്ക്കും മാത്രമല്ല പ്രഗത്ഭരായ മറ്റുള്ളവര്ക്കും ബാധകമാണെന്ന് ഒന്നു
കൂടി വ്യക്തമായി.സിനിമാക്കാരെയും രാഷ്ട്രീയക്കാരെയും,ജീവിച്ചിരിക്കുമ്പോള് അവഗണിച്ചാലും അവരുടെ മരണം ആഘോഷമാക്കി മാറ്റാന് ചാനലുകളും അച്ചടി മാദ്ധ്യമങ്ങളും ശ്രദ്ധിക്കാറുണ്ട്.അത്തരം മരണാനന്തര ഭാഗ്യം പോലും ഈ മുന് വൈസ്ചാന്സലര്ക്കു കിട്ടിയില്ല.അടൂര് പങ്കജം മുതല് എ.അയ്യപ്പന് വരെയുള്ള
വരുടെ മൃതശരീരത്തിനു പിന്നാലെ, ആദരിക്കാന് ആചാര വെടിയുമായി നടന്ന വിദ്യാഭ്യാസ മന്ത്രി,താന് പ്രോ ചാന്സലറായഒരു സര്വ്വകലാശാലയിലെ മുന് വൈസ്ചാന്സലര് ആയിരുന്ന ഹബീബ് മുഹമ്മദിനെ ഒരു പൊട്ടാസുപൊട്ടിച്ചു പോലും ആദരിച്ചതായി കേട്ടില്ല.
സമര കലുഷിതമായ ഒരു കാലഘട്ടത്തില് കേരള സര്വ്വകലാശാലയെ നയിച്ച വൈസ്ചാന്സലര് ആയിരുന്നു ശ്രീ.ഹബീബ് മുഹമ്മദ്.വിദ്യാഭ്യാസ വിചക്ഷണരായി അറിയപ്പെട്ടിട്ടുള്ളവര് മാത്രമിരുന്ന വൈസ് ചാന്സലറുടെ കസേരയില് ഒരു ഐ .എ എസ്സുകാരന് അവരോധിക്കപ്പെടുന്നത് കേരള സര്വ്വകലാശാലയില് ആദ്യമായിരുന്നു. അതുകൊണ്ടു തന്നെ അക്കാഡമീഷ്യന്സിന്റെ ഇടയില് നിന്നും മുറുമുറുപ്പ് ഉയര്ന്നു.ആദ്യത്തെ പത്രസമ്മേളനത്തിലോ വിദ്യാര്ത്ഥികളുമായി നടത്തിയ അഭിമുഖത്തിലോ മറ്റോ അദ്ദേഹം, "കേരള സര്വ്വകലാശാല കണ്ടതില് വച്ച് ഏറ്റവും സംസ്ക്കാരശൂന്യനായ വൈസ് ചാന്സലറായിരിക്കും ഞാന്" എന്നു പറഞ്ഞതോടെ അപവാദ,പരിഹാസ പ്രചരണങ്ങള്ക്ക് ആക്കം കൂടി.
പല സന്ദര്ഭങ്ങളിലും ഈ"ശൂന്യ"ഭീഷണി അദ്ദേഹം ആവര്ത്തിക്കാറുണ്ടായിരുന്നെങ്കിലും സംസ്കാര സമ്പന്നരെന്നു ഖ്യാതിപ്പെട്ട അക്കാഡമിഷ്യന്മാരില് പലരെക്കാളും മാന്യമായിട്ടായിരുന്നു അദ്ദേഹം പെരുമാറിയിരുന്നത്.വള്ളത്തോള്, നാടന് കൃഷിക്കാരെപ്പറ്റി പറഞ്ഞതു പോലെ,ഒരുമാതിരി നാളികേരപ്പാകം.പുറമേ പരുക്കനെന്നു തോന്നുമെങ്കിലും അകമേ സന്മനസ്സും സഹൃദയത്വവും.
കേരളത്തിലെ ഒരു നാട്ടിന് പുറത്ത് ജനിച്ച അദ്ദേഹം അങ്ങനെ ആയില്ലെങ്കിലേ അത്ഭുതമുള്ളൂ.കോളെജ് അദ്ധ്യാപകനായിരിക്കേ ഐ.എ.എസ് ലഭിച്ച ഹബീബ് മുഹമ്മദ് ഒറീസാ ചീഫ് സെക്രട്ടറിയായിരിക്കുമ്പോഴാണ് കേരള സര്വ്വകലാശാലയില് വി.സി ആയി നിയമിക്ക
പ്പെട്ടത്.കുറേ നാള് റബ്ബര്ബോഡ് ചെയര്മാനുമായിരുന്നു.വളരെക്കാലം കേരളത്തിനു പുറത്തായിരുന്നെങ്കിലും കേരളീയന്റെ മനശ്ശാസ്ത്രം നല്ല വശമായിരുന്നു.വായില് സ്വര്ണ്ണക്കരണ്ടിയുമായി ജനിച്ച ഐ.എ.എസ്സു കാരുടെ ജനുസ്സില് പെടാത്തതാകാം കാരണം.
ആദ്യം വിദ്യാര്ത്ഥികളുമായി ഉടക്കിയതു പോലെ അദ്ധ്യാപകരുമായും അനദ്ധ്യാപകരുമായി അദ്ദേഹം കൊമ്പു കോര്ക്കുകയുണ്ടായി.അതെല്ലാം യൂണിവേഴ്സിറ്റിയുടെ നന്മയ്ക്കു വേണ്ടി ആയിരുന്നു.ആരോടും വ്യക്തിപരമയ പാരുഷ്യമോ പകപോക്കലോ അതിനുപിന്നില് ഉണ്ടായിരുന്നില്ല.അതുവരെ വി.സി വിളിച്ചു കൂട്ടുന്ന വകുപ്പദ്ധ്യക്ഷന്മാരുടെ യോഗങ്ങള് വെറും വഴിപാടായിരുന്നു.പതിവു രീതി അവലംബിച്ച പഠന വകുപ്പു തലവന്മാര് ഒറ്റ യോഗത്തോടെ നേര് വഴിയിലായി.ആരെയും ശിക്ഷിക്കാതെ തന്നെ ഓഫീസ് പ്രവര്ത്തനം കാര്യ്ക്ഷമമാക്കുവാനും അദ്ദേഹത്തിനു സാധിച്ചു.പുതിയ പ്രൊ-വൈസ് ചാന്സലറും പ്രീഡിഗ്രി ബോഡ് വിരുദ്ധ സമരവും വന്നതോടെ കാര്യങ്ങള് കുഴഞ്ഞു മറിഞ്ഞെങ്കിലും വളരെ വേഗം പൂര്വ്വസ്ഥിതി വീണ്ടെടുക്കാന് കഴിഞ്ഞത് വൈസ് ചാന്സലറുടെ മിടുക്കു കൊണ്ടാണ്.സര്ക്കാര്,സര്വ്വകലാശാലാ നിയമങ്ങള് ശരിക്ക് അറിയാവുന്നതിനാല് കാലതാമസം കൂടാതെ തീരുമാനം എടുക്കാന് അദ്ദേഹത്തിനു കഴിഞ്ഞു.സ്ഥാപിത താല്പര്യങ്ങള്
ഇല്ലാതിരുന്നതും ഭരണം സുഗമ മാക്കാന് സഹായകമായി.
സിന്ഡിക്കേറ്റിന്റെ അമിതാധികാര പ്രവണതയ്ക്കു തടയിടാന് കഴിഞ്ഞതാണ് ഹബീബ് മുഹമ്മദിന്റെ ഭരണ കാലത്തെ ഏറ്റവും വലിയ നേട്ടം.(പിന്നീടു വന്ന റബ്ബര് നട്ടെല്ലുള്ള പല വി.സി മാരും അതു കളഞ്ഞുകുളിച്ചു എന്നതു വേറെ കാര്യം)അദ്ദേഹത്തിനു മുമ്പും പിമ്പും സര്വ്വകലശാല തങ്ങളുടെ കുടുംബ സ്വത്താണെന്നു ഭാവിച്ചു നടന്നിരുന്ന പല സിന്ഡിക്കേറ്റംഗങ്ങളും അന്ന് വളരെ മര്യാദ നാരായണന്മാരായിട്ടാണ് പെരുമാറിയത്.
ജീവനക്കാരുടെ പ്രശ്നങ്ങളെ ചൊല്ലി പലപ്പോഴും വൈസ് ചാന്സലറുമായി ഇടയേണ്ടി വന്നിട്ടുണ്ട്.പക്ഷേ അതിന്റെ പേരില് പകയും വിദ്വേഷവും അദ്ദേഹം വച്ചു പുലര്ത്തിയിരുന്നില്ല.വി.സിയുടെ കാലാവധി കഴിഞ്ഞ് ഒറീസയിലേക്കു തിരികെ പോയ അദ്ദേഹത്തെ പിന്നീടു ഒന്നു രണ്ടു തവണ കണ്ടപ്പോള് അതു ശരിക്കും ബോദ്ധ്യമായി.
അപ്രതീക്ഷിതമായിട്ടല്ലെങ്കിലും പൊലിഞ്ഞു പോയ ആ കര്മ്മ കുശലന്റെ സ്മരണയ്ക്കു മുമ്പില് ആദരാഞ്ജലികള്.
Fans on the page
Sunday, November 14, 2010
സഖാവേ!ഇതു വളരെ ചീപ്പായിപ്പോയി
പിണറായി വിജയന് അപകീര്ത്തികരമായ ഇ മെയില് പ്രചരിപ്പിച്ചതിന്റെ പേരില് മൊയ്തു എന്നയാളെ പോലീസ് അറസ്റ്റു ചെയ്തിരിക്കുന്നു.ഐ.റ്റി.ആക്റ്റിലെ ബന്ധപ്പെട്ട വകുപ്പുകള് അനുസരിച്ച്, മൂന്നു വര്ഷം തടവും ഒരു ലക്ഷം രൂപ പിഴയും ചുമത്താവുന്ന കുറ്റമാണത്രെ ശ്രീ.മൊയ്തു ചെയ്തിരിക്കുന്നത്.
തദ്ദേശ സ്വയംഭരണ സ്ഥാപനങ്ങളിലേക്ക് നടന്ന തെരഞ്ഞെടുപ്പിലെ പരാജയത്തിന്റെ ജാള്യം മറ
യ്ക്കാന് പിണറായി നടത്തുന്ന പ്രസ്താവനകളായി "സന്ദേശം" സിനിമയിലെ ശങ്കരാടിയുടെ ഡയലോഗു
കള് ഫോര്വേഡ് ചെയ്തതിന്റെ പേരിലാണ് മൊയ്തു അറസ്റ്റിലായത്.ആരോ അയച്ച മെയില് ഫോര്വേ
ഡ് ചെയ്യുക മാത്രമേ താന് ചെയ്തിട്ടുള്ളൂ എന്നാണ് പ്രതിയുടെ ഭാഷ്യം.
മുമ്പ് മറ്റാരുടെയോ മണിമന്ദിരത്തിന്റെ ഫോട്ടോ സ.പിണറായി വിജയന്റെ വീട് ആണെന്നു പറഞ്ഞ് നെറ്റില് പ്രചരിപ്പിച്ച ചിലരെ സ. പിണറായിയുടെ പരാതിയുടെ അടിസ്ഥാനത്തില് ഇതുപോലെ അറ
സ്റ്റു ചെയ്തിരുന്നു.അപകീര്ത്തിപ്പെടുത്തുവാന് ഉദ്ദേശിച്ചു നടത്തിയ അസത്യ പ്രചാരകരെ നിയമത്തിന്റെ പിടിയില് വരുത്തിയതില് ഭൂരിഭാഗം ജനങ്ങളും സന്തോഷിച്ചു.സൈബര് കുറ്റകൃത്യങ്ങള് ചെയ്യുന്ന വ
ര്ക്കും ചെയ്യാന് ഒരുങ്ങുന്നവര്ക്കും അതൊരു താക്കീതും മുന്നറിയിപ്പും ആയിരുന്നു.വ്യക്തിപരം എന്നതി
നപ്പുറം സാമൂഹിക പ്രസക്തിയുള്ള സംഭവമായി രാഷ്ട്രീയ ഭേദമെന്യേ എല്ലാവരും അതിനെ വിലയിരു
ത്തി.
പക്ഷേ തന്നെ കളിയാക്കി പ്രചരിക്കുന്ന മെയിലിന്റെ പേരില് പരാതിയും കേസുമായി പോയത് വെറും അല്പത്തമായിപ്പോയി.സ.പിണറായിയെ പോലെ ദീര്ഘകാല പ്രവര്ത്തന ചരിത്രമുള്ള ഒരു രാഷ്ട്രീയ നേതാവ് ഇത്തരം ചെറിയ കര്യങ്ങളില് അസഹിഷ്ണുത പ്രകടിപ്പിക്കുന്നത് മോശമാണ്.വൈതാളികരും വന്ദികളും അടങ്ങുന്ന ഉപജാപക സംഘങ്ങള് അല്ലാതെ മറ്റാരും ഇത് സല്പ്രവൃത്തിയാണെന്ന് വാ
ഴ്ത്തുകയില്ല.വിമര്ശനങ്ങള്ക്കും പരിഹാസങ്ങള്ക്കും ഒക്കെ അതീതനാണ് താന് എന്ന് ഒരു പൊതു പ്രവര്ത്തകന് കരുതുന്നത് ആശാസ്യമല്ല.
ഹിന്ദുദൈവങ്ങളെ ആക്ഷേപിക്കുന്നു എന്നാരോപിച്ച് "ചിത്രകാര"നെതിരെ കേസ്സുകൊടുത്ത ഒരു ബാലി
ശബുദ്ധിയായ ബ്ലോഗറെപ്പോലെയും നായന്മാരെ അപമാനിക്കുന്നതില് രോഷം പൂണ്ട് പരാതി നല്കി വേറൊരു ബ്ലോഗ് പൂട്ടിച്ച എന്.എസ്.എസ് പ്രസിഡന്റിനെപ്പോലെയും സി.പി.എം സെക്രട്ടറി പെരുമാ
റുന്നത് ശരിയോ?വ്യക്തിപരമായ നേട്ടത്തിനോ പരിഹാസ പരിഹാരത്തിനോ ആയിരുന്നില്ല പരാതിയു
മായി സൈബര് സെല്ലിനെ സമീപിച്ചതെന്ന ന്യായീകരണമെങ്കിലും മേല്പറഞ്ഞ രണ്ടു പേര്ക്കും പറയാ
നുണ്ടാകും.
മുലകുടി മാറാത്ത കുട്ടികള് മുതല് മദ്ധ്യവയസ്കര് വരെ മിമിക്രിക്കു വിഷയമാക്കിക്കൊണ്ടിരിക്കുന്ന സ്വന്തം
പാര്ട്ടിക്കാരനായ മുഖ്യമന്ത്രി സ. വി.എസ്.അച്യുതാനന്ദനെ ഇക്കാര്യത്തില് മാതൃകയാക്കുകയാണ് നല്ലത്.അതിന് സ.പിണറായിക്ക് വൈമനസ്യവും ചമ്മലുമുണ്ടെങ്കില് അദ്ദേഹത്തിനും മുമ്പ് മുഖ്യമന്ത്രി
യായിരുന്ന സ.ഇ.കെ.നായനാരെ മാതൃകയാക്കാം.
Fans on the page
Friday, November 5, 2010
*വിജയം
നാട്ടുകാര്ക്ക് ഉപകാരമുള്ള
നല്ല കാര്യങ്ങള് ഒരുപാടു ഞാന് ചെയ്തു;
പക്ഷേ അവര്ക്കതു മനസ്സിലായില്ല.
നന്നാകാനുള്ള
നാനാതരം ഉപദേശങ്ങള്
പല വട്ടം
പല മട്ടില് പറഞ്ഞു;
അതും അവര് ഗ്രഹിച്ചില്ല.
തലോടാന് പൊക്കിയ എന്റെ
വലതു കൈ അവര് അരിഞ്ഞു വീഴ്ത്തി;
ഓടാനൊരുങ്ങിയ എന്റെ കാലു രണ്ടും
അടിച്ചൊടിച്ചു.
താഴെ വീണു തല പൊട്ടിയപ്പോള്
കഴുത്തിലും വയറ്റിലും കുത്തി.
(കത്തിയുടാകൃതി എന്തെന്നോര്മ്മയില്ല)
എങ്കിലും ആശുപത്രിയിലെ
ഭാരമളക്കുന്ന ഉപകരണത്തില് നോക്കിയപ്പോള്
എന്റെ തൂക്കം മുമ്പത്തെക്കാള്
രണ്ടു ശതമാനം കൂടിയിരിക്കുന്നു!!
..................................
*സമീപ കാല രാഷ്ട്രീയ സംഭവ വികാസങ്ങളുമായി ഈ കവിതയ്ക്ക് യാതൊരു ബന്ധവുമില്ല.ആര്ക്കെങ്കിലും അങ്ങനെ തോന്നുന്നെങ്കില് കവി ഉത്തരവാദിയല്ല.
Fans on the page
Saturday, October 30, 2010
സുപ്രീം കോടതിയുടെ പുതിയ നിയമപുസ്തകം
ഇന്ത്യന് ഭരണഘടനയും പീനല് കോഡും മറ്റ് അംഗീകൃത നിയമ സംഹിതകളും ആധാരമാക്കിയാണ് നമ്മുടെ നീതിന്യായ കോടതികള് വിധി പ്രസ്താവിക്കുന്നതെന്നാണ് ഇതുവരെ ധരിച്ചിരുന്നത്.എന്നാല് കഴിഞ്ഞദിവസം പുറത്തുവന്ന ഒരു സുപ്രീം കോടതി വിധി ഈ ധാരണയെ അപ്പാടെ തകിടം മറിച്ചിരിക്കുന്നു. എല്ലാ നിയമ പുസ്തകങ്ങളെയും വെല്ലുന്ന ഇമ്മിണി ബല്യ പുസ്തകം ഇന്ത്യാ മഹാരാജ്യത്ത് നിലവിലുണ്ടത്രെ.സ്വാശ്രയ മെഡിക്കല് കോളേജുകളുടെ പ്രോസ്പക്റ്റസ് ആണ് ഈ അലംഘനീയവും വിശുദ്ധവുമായ നിയമ പ്രമാണം.
സര്ക്കാരുമായി കരാര് ഒപ്പിട്ട സ്വാശ്രയ മെഡിക്കല് കോളേജുകളിലെ പ്രവേശനത്തിന് 22.5 ലക്ഷം രൂപയുടെ ബാങ്ക് ഗ്യാരന്റി വാങ്ങുന്നതിനെതിരെ വിദ്യാര്ത്ഥികള് കേരളാ ഹൈക്കോടതിയില് സമര്പ്പിച്ച ഹര്ജിയില് അവര്ക്ക് അനുകൂലമായുണ്ടായ സിംഗിള് ബഞ്ച് വിധി, ഡിവിഷന് ബഞ്ച് അസ്ഥിരപ്പെടുത്തി.അതിനെതി
രെ കുട്ടികള് സുപ്രീം കോടതിയെ സമീപിച്ചപ്പോള് സ്വാശ്രയ മാനേജ്മെന്റിന് അനുകൂലമായ വിധിയാണ് ഉണ്ടാ
യിരിക്കുന്നത്.22.5 ലക്ഷം രൂപയുടെ ബാങ്ക് ഗാരന്റി വേണമെന്ന് കോളേജുകളുടെ പ്രോസ്പെക്റ്റസ്സില് നിഷ്കര്ഷിച്ചിട്ടുള്ളതിനാല് വിദ്യാര്ത്ഥികള് അത് അനുസരിക്കണം എന്നാണ് പരമോന്നത നീതിപീഠത്തിന്റെ ഉത്തരവ്."ഗാരന്റി വാങ്ങണമെന്ന് പ്രോസ്പെക്റ്റസ്സില് വ്യവസ്ഥയുണ്ടെങ്കില് ഞങ്ങള് എങ്ങനെ ഇടപെടും?"എന്നാണത്രേ ബഹു.ജസ്റ്റിസുമാരായ സുദര്ശന് റെഡ്ഢിയും
എസ്.എസ്.നിജ്ജറുമടങ്ങുന്ന സുപ്രീംകോടതി ബഞ്ച് ചോദിച്ചത്.
മെഡിക്കല് പ്രവേശനത്തിന് തങ്ങള് നിര്ദ്ദേശിച്ചിട്ടുള്ള മിനിമം മാര്ക്ക് ഇല്ലാത്തതിന്റെ പേരില് മറ്റുചില സ്വാശ്രയ മെഡിക്കല് കോളേജുകളിലെ ഏതാനും വിദ്യാര്ത്ഥികളുടെ പ്രവേശനം റദ്ദു ചെയ്ത മെഡിക്കല് കൗണ്സിലിന്റെ നടപടിക്കെതിരെ മാനേജ്മെന്റ് നല്കിയ ഹര്ജിയില് മാനേജ്മെന്റിനും വിദ്യാര്ത്ഥികള്ക്കും അനുകൂലമായ വിധി പുറപ്പെടുവിച്ച സുപ്രീം കോടതി ജഡ്ജിമാരും ആധാരമാക്കിയത് ആ കോളേജുകളുടെ പ്രൊസ്പക്റ്റസ്സിലെ വ്യവസ്ഥകളായിരുന്നു.
സാധാരണ നിയമ പുസ്തകങ്ങളെ അവലംബിച്ച് ഹൈക്കോടതി ജഡ്ജി പുറപ്പെടുവിച്ച ഉത്തരവു റദ്ദു ചെയ്യാം.ആരോഗ്യ വിദ്യാഭ്യാസത്തെ കുറിച്ച് ആധികാരികമായി പറയാന് അര്ഹതയുള്ള മെഡിക്കല് കൗണ്സിലിന്റെ നിയമാവലി തള്ളിക്കളയാം.പക്ഷേ സ്വാശ്രയ കോളെജ് മാനേജ്മെന്റ് തയ്യാറാക്കിയ പ്രോസ്പക്റ്റസിലെ വ്യവസ്ഥകള്ക്കെതിരെ ശബ്ദിക്കാന് സുപ്രീം കോടതിയ്ക്ക് അധികാരമില്ല!ഇന്ത്യന് നിയമ വ്യവസ്ഥകള്ക്കും ഭരണഘടനയ്ക്കും ഒക്കെ മുകളില് അലംഘനീയവും അതിവിശുദ്ധവും ആയി പരിലസിക്കുന്ന ഈ പുത്തന് നിയമ പ്രമാണത്തനു മുമ്പില് നമുക്കും കുമ്പിടാം!ഇനി മേല് ന്യായാ
ധിപന്മാരുടെ സത്യപ്രതിജ്ഞ, ഈ വിശുദ്ധ രേഖ തൊട്ട് ആകുമോ എന്നേ കാണേണ്ടതുള്ളു !!!
Fans on the page
Tuesday, October 26, 2010
അയ്യപ്പന് പറയുമായിരുന്നത്
"എടാ ശിശൂ(ബേബി എന്ന് സംസ്കൃതം)
"മൊബൈല് മോര്ച്ചറിയ്ക്കെത്ര?"
"നാലായിരം"
"ഹാള് വാടക?"
"അതു സര്ക്കാര് വക.നമുക്ക് വാടക വേണ്ട."
"അപ്പന്റെ വഹയല്ലല്ലോ ഹാള്?"
"അല്ല"
"അപ്പോള് വാടക പറയെട ..മോനേ"
"പതിനായിരം"
"ശവഘോഷയാത്രയ്ക്കും
ആചാര വെടിയ്ക്കും
അനുബന്ധ വ്യവസായങ്ങള്ക്കും കൂടി?"
"അതെല്ലാം സര്ക്കാര് ചെലവാ."
"പിന്നേം ദാ...
എന്നെക്കൊണ്ട് മറുഭാഷ പറയിപ്പിക്കരുത്."
"കണക്കു കൂട്ടണം"
"അതിനു നിനക്കു കണക്കറിയുമോ?"
"ചോംസ്കിയ്ക്കും കണക്ക്..."
"കണക്കില്ലാതെ ചെലവാക്കാന്
കണക്കറിയേണ്ടന്നാകും.
തൊണ്ട നനയ്ക്കാനിത്തിരി വാങ്ങാന്
തെരുവില് ഞാന് അലഞ്ഞു നടന്നപ്പോള്
കണാത്ത മട്ടില് ഒഴിഞ്ഞു മാറിയ
നിന്റെയും നിന്റെ സര്ക്കാരിന്റെയും
മരണാനന്തര സല്ക്കാരം
എനിക്കു ബോധിച്ചു.
കൂ കൂ കൂ കൂ.........."
Fans on the page
Subscribe to:
Posts (Atom)